专家拆局：皇马开火轰马略卡

皇马开火轰马略卡

行运撞正私房菜

今晚西甲压轴尾场，皇家马德里喺B队主场迪史堤芬奴球场迎战马略卡。「银河舰队」重登榜首之馀，王牌夏萨特同箭头宾施马愈嚟愈夹，火力全开，撞正「私房菜」马略卡必趁热食，让两球唔怕辣，照捧让球主胜。

夏萨特有起色

自从联赛重开后，皇马3战赢晒，未计周中赛事已登上榜首，而且好运到冇朋友，好似上仗赢皇苏2比1场波，皇苏翼锋赞奴沙远射破网，虽然队友米基尔马连奴喺越位位置，但佢冇掂到个波，不过球证认为米基尔马连奴阻住皇马门将泰拔高图尔斯嘅视线，判入球无效，颇具争议，皇马认真行运。

此外今季一直饱受伤患困扰嘅夏萨特，经联赛停摆可专心养伤后，表现有起色，早前连续两场交出助攻，上场列作后备明显留力搏今场。儘管有队长沙治奥拉莫斯上阵成疑，但宾施马连续两仗有士哥够生勐，有佢配合「夏神」火力全开。依家皇马重掌争标主动权，战意爆灯，唔炒多几球都唔会收手。

马略卡喺下游挣扎，重开后3战1和2负状态亦曳，呢支小岛球队最大问题係作客脚软，今季14场联赛作客只得1胜2和11负，加上马略卡做惯皇马「私房菜」，双方近4次交手，马略卡有3次至少输3粒，今场都係等劏格，让球主胜有买趁早。