专家拆局：修咸顿细孤力弱

残阵迎击纽卡素

今周英超提前周五开打，今晚尾场有修咸顿主场对纽卡素；修咸顿近5场联赛4胜1和，状态弗到漏，不过佢哋呢场波多名主力受伤，当中冇咗首席射手丹尼艾格斯影响最大；纽卡素作客擅打下风波，开季3场联赛作客未输过，总入球全开2球或以下，今场拣中位数2.5球入球细最稳阵。

修咸顿上周末联赛作客4比3击败阿士东维拉，近5场联赛赢4场，而且上场更一度领先4比0，赢得充满说服力，不过胜利背后都要付出一定代价，前锋丹尼艾格斯、左闸赖恩贝特兰及中坚碧拿历克喺嗰场比赛先后伤出，当中丹尼艾格斯及赖恩贝特兰今仗肯定缺阵，前者今季喺联赛射入5球兼交出2次助攻，创造7个入波，佔球队总入球一半，据报呢名28岁射手至少需要休息4至6个礼拜，冇咗佢对进攻肯定有影响。

艾格斯贝特兰齐缺阵

至于赖恩贝特兰负责喺左路助攻助守，亦係球队主力，最惨上场入替佢嘅伊巴谦马迪亚路赛后亦证实有伤，连同碧拿历克都要经过体测先知能否上阵，战斗力或打折扣。

纽卡素近况亦唔曳，上周主场2比1击败赛前排榜首嘅爱华顿，现以7战得11分排联赛榜第11位，而且佢哋今季3场作客联赛未输过，包括击败韦斯咸、打和热刺及狼队，3场全开2球或以下，上半场加埋只有1个入波出现，稳守突击战术非常奏效；新加盟嘅哥林威尔逊今季联赛已入6球，效率唔差得过丹尼艾格斯，呢场未必冇得打，中位数2.5球入球细值得捧场。